बजारमा नक्कली हार्डडिस्क छ्याप्छ्याप्ती

भिडियो हेर्नको माथि को बक्स मा डबल क्लिक गर्नु होस्

काठमाडौ, श्रावण ११ - डिजिटल डाटा स्टोरेज गर्ने हार्ड डिस्क बजारमा नक्कली पाइन थालेका छन् । यसले उपभोक्ताको डाटा असुरक्षित हुनुका साथै मूल्य र गुणस्तरमा ठगिने क्रम बढेको छ । बजारमा खास गरी डेस्कटप र ल्यापटपका हार्ड डिस्क नक्कली आउन थालेको वेस्टर्न डिजिटल (डब्लुडी) को आधिकारिक बिक्रेता मेगाटेकका सुरेश लोहनी बताउँछन् । धेरै प्रयोग हुने स्टोरेज डिभाइस कम्प्युटरमै जोडिने हार्डडिस्क हो । सुरुमा प्यारालल एड्भान्स टेक्नोलोजी एट्याचमेन्ट (पाटा) डिस्क चल्तीमा थिए । तिनको ठाउँ अहिले आधुनिक प्रविधिको सिरिएल एडभान्स टेक्नोलोजी एट्याचमेन्ट (साटा) हार्डडिस्कले लिएका छन् । नेपालमा धेरै बिक्री हुने डब्लूडीका भारत र दक्षिण एसिया निर्देशक सुब्रतो दास आफूहरूको प्रतिस्पर्धा नक्कली हार्ड डिस्कसँग रहेको बताउँछन् । 'हाम्रै कम्पनीको नाममा स्टिकर टाँसेर बजारमा हार्डडिस्क ल्याइएका छन्,' उनले भने, 'तिनले उपभोक्तालाई ठगिरहेका छन् । उनीहरूको डाटालाई समेत जोखिममा पारेका छन् ।' पुराना/बिगि्रएका हार्डडिस्कलाई मर्मत गरेर बजारमा ल्याउने गरिएको छ । त्यस्ता हार्डडिस्कमा भनेजति क्षमता नहुने, वारेन्टी नहुने र जुनसुकै बेला डाटा नष्ट हुन सक्ने डब्लूडीका निर्देशक दासको भनाइ छ । उनले हार्डडिस्क किन्नुअघि सक्कली भएको निश्चित गर्नुपर्ने बताए । 'हरेक व्यक्तिले आफ्नो सम्पत्तिलाई डिजिटलमा परिवर्तन गर्दै छन्,' मेगाटेकका लोहनीले भने, उनीहरूले आफ्नो स्टोर कति बलियो छ भन्ने थाहा पाउनुपर्छ ।' सानो भुलले वर्षौंको मेहनत खेर जान सक्ने उनले बताए । सक्कली हार्डडिस्कमा सिरियल नम्बर र उत्पादन मिति उल्लेख हुन्छ । मेगा टेकले डब्लूडीको हार्डडिस्क सक्ककली हो/होइन भन्ने जानकारी एसएमएसबाट दिने व्यवस्था गरेको छ ।