लाहुरे कवि बेलायतमा सेलरोटी बेच्छन्

भिडियो हेर्नको माथि को बक्स मा डबल क्लिक गर्नु होस्

लन्डन, चैत्र १ - बेलायतको नाम सुन्नेबित्तिकै धेरै सोच्दा हुन्— यहाँ रूख चढेर पाउन्ड टिपिन्छ, ऐसआराम र विलासी जीवन छ । भूपू बि्रटिस लाहुरे हेम थापा सेठको जीवनशैली हेर्दा माथिका सबै कुरा भ्रम रहेको पुष्टि हुन्छ । बि्रटिस आर्मीमा १५ वर्ष छिचोलेर अवकाश लिएका उनी अहिले लन्डनमा सेलरोटी पकाएर जिन्दगी गुजारा गरिरहेका छन् । 'खान नपुगेर यो पेसा अँगालेको होइन,' गफगाफको सुरुतिरै उनी प्रस्टीकरण दिँदै थिए, 'बेलायतमा नेपालीका भोजभतेर, कर्मकाण्ड बढेसँगै माग बढेपछि सेलरोटी पोल्न थालेको हुँ ।' बेलायतमा काम ठूलो-सानो नमानिने भएर पनि थापालाई आफैं यस्तो व्यवसाय गर्न कत्ति हिचकिचाहट भएन । सामाजिक यथार्थवादी उपन्यास 'बादलपारिको देश' र कविता संग्रह 'लोक व्यथा' प्रकाशित गरिसकेका लाहुरे कवि थापाले लन्डन अल्पर्टनमा भर्खर खुलेको गोर्खा सुपरस्टोरमा ताजा सेलरोटी राख्ने गरेका छन् । गायिका इन्द्रा थापा आफैंले रोटी बनाउँछिन् । चिनियाँ, थाई, अपि|mकी, अंग्रेजी र नेपाली सबै खाना बनाउन माहिर इन्द्राले 'अन्यत्र पाइनेभन्दा उत्कृष्ट सेलरोटी बनाउने गरेको' थापाको दाबी छ । 'बेलायतको फुड स्ट्यान्डर्ड एजेन्सीले अपेक्षा गर्ने बराबरको गुणस्तर छ,' थापाले बखान गरे, 'हामीले लार्ज, मिडियम, स्मल साइज बनाउँछौं । सुगर प|mी चाहने पनि पाउँछन् ।' अनलाइन अर्डरको व्यवस्थासमेत छ । त्यसो त ५० हजार पाउन्ड लगानीमा सञ्चालित उनको स्टोरमा खसी, बँदेल, बंगुर, कालिज, गिरिराज, मृगको मासुदेखि सबै खालका नेपाली खाद्यान्न र विवाह, व्रतबन्ध, रुद्री लगायत हरेक कर्मकाण्डमा चाहिने परम्परागत सामग्री समेत उपलब्ध छन् । एक छोरा, एक छोरी बि्रटिस आर्मीमै सेवारत छन्, थापा भने पारिवारिक व्यवसायतिर । बेलायतमा आफ्नो यो पहिलो व्यवसाय भए पनि थापा आर्मी नोकरी सकिनेबित्तिकै सन् १९९० देखि व्यापार व्यवसायमा लागेका हुन् । हङकङ आईडी वाहक थापाले नेपालमा केही वर्ष पाङ्ग्रे व्यापार पनि सम्हाले, हङकङमा किन्डर गार्डेन चलाए । हङकङ आउजाउ भए पनि ११ वर्षयता बेलायतमा स्थायी बसोबास छ उनको । थापाले तीन एल्बमलाई पुग्ने गीतसमेत लेखेका छन् तर रेकर्ड हुन पाएन । सन् २००६ तिर विदेश बस्ने मगर जातिलाई केन्दि्रत गरेर लेखिएको एउटा गीत रेकर्ड गर्न नेपालमा ३० हजार रुपैयाँ मागेपछि त्यो त्यत्तिकै थन्किएछ । 'सुरुमा ५ हजार रुपैयाँमा रेकर्ड हुन्छ भनेर ओके गरेको पछि बढाउँदा बढाउँदै ३० हजार मागेपछि योजनै त्यागिदिएँ,' थापा नेपालको सांगीतिक बेथिति पोख्छन् । फुर्सद भएसम्म उनले कविता र गीत लेखन त्यागेका छैनन्, बेलाबेला स्थानीय कार्यक्रममा कविता वाचन माहोलमा उनी पनि झुल्किन्छन् । 'एउटा एल्बमचाहिँ छिट्टै ल्याउने जमर्को छ,' कुरा बिट मार्दै सेल सम्हाल्न लागे उनी ।श्रोत :कान्तिपुर