ग्यास उद्योगीको चेतावनी-कमिसन नबढाए सोमबारदेखि प्लान्ट बन्द गर्ने

भिडियो हेर्नको माथि को बक्स मा डबल क्लिक गर्नु होस्

काठमाडौ, जेष्ठ १० - कमिसन वृद्धि र अन्य खर्चका लागि बारम्बार आन्दोलन गर्दै सरकारलाई थर्काउँदै आएका ग्यास उद्योगीले पुनः ३ दिने अल्टिमेटम दिएका छन् । उनीहरूले प्लान्ट धान्ने कमिसन र सञ्चालन खर्च उपलब्ध गराउनु पर्नेलगायत माग पूरा नभए सोमबारदेखि उद्योग बन्द गर्ने चेतावनी दिएका हुन् । '१८ महिनासम्म धैर्यतापूर्वक प्रतीक्षा गर्‍र्यौं,' संघका अध्यक्ष शिवप्रसाद घिमिरेले भने, 'सरकारले १५ दिन पर्खनुहोस्, जायज माग पूरा गर्छौं भनेर ढाँट्यो । अब कमिसन र सञ्चालन खर्च वृद्धि नभए उद्योग बन्द गर्नुको विकल्प छैन ।'ग्यास उद्योगीले हाल प्रतिसिलिन्डर ग्यासमा ढुवानी खर्च, मुनाफा, सञ्चालन खर्च, ओभरहेड कस्ट, बिक्रेता कमिसनलगायत सम्पूर्ण खर्चसमेत गरी २ सय १३ रुपैयाँ पाउँछन् । उनीहरूले ग्यास प्लान्ट धान्न त्यसमा ५७ रुपैयाँ ९२ पैसा थप्नुपर्ने माग राखेका छन् । 'हाल उपलब्ध सञ्चालन खर्च, मुनाफा, विक्रेता कमिसनलगायत सम्पूर्ण खर्चमा कम्तीमा ५७ रुपैयाँ ९२ पैसा थपिदिनुपर्छ भन्ने हाम्रो माग हो,' घिमिरेले भने, 'त्यति रकम नथपिदिए उद्योग चलाउन सक्दैनौं । आइतबारसम्म माग पूरा नभए सोमबारदेखि उद्योगीले आआफ्नो उद्योग ताला लगाउने छन् ।'उद्योगीलाई प्रतिसिलिन्डर ग्यासमा २८ रुपैयाँ कमिसन छ । आयल निगमकै विश्लेषणअनुसार अहिलेको अवस्थामा घाटामा नजान प्रत्येक ग्यास प्लान्टले मासिक ४ सय मेटि्रक टन ग्यास पाउनुपर्छ । तर निगमले हरेक प्लान्टलाई त्यति ग्यास उपलब्ध गराउन सकेको छैन । संघले पटकपटक अध्ययन गराई पेट्रोलपम्पको कमिसन बढाइएको तर तिनै अध्ययनका सिफारिसअनुसार ग्यासमा कमिसन नबढाइएको जनाएको छ । निगम र वाणिज्य तथा आपूर्ति मन्त्रालयले २०६८ पुस, २०६९ साउन र फागुन गरी ३ वटा छुट्टाछुट्टै समितिबाट पेट्रोलीयम व्यवसायीको कमिसन र सञ्चालन खर्च बढाउने सम्बन्धमा अध्ययन गराएको छ । ती अध्ययनले कमिसन समयसापेक्ष तथा वैज्ञानिक बनाउन सुझाव दिएका छन् । पछिल्लो पटक गठित पुष्कर बज्राचार्य संयोजकत्वको समितिले गरेको अध्ययनले त ग्यासमा ढुवानी भाडा तथा कमिसन बढाउन सुझाव दिएको छ । यी अध्ययन भीम आचार्य संयोजकत्वको उच्चस्तरीय आयोग तथा सरकारी निर्णय विपरीत छ । तर तिनै अध्ययनको सिफारिसका आधारमा भए पनि निगम सञ्चालकले पेट्रोल, डिजेल र हवाई इन्धनको ढुवानी भाडा तथा पम्पको कमिसन बढाएका छन् । ग्यासमा भने सञ्चालन खर्च, कमिसन र ढुवानी भाडा वृद्धि गरिएको छैन । पेट्रोलिय ढुवानी व्यवसायी महासंघ र पेट्रोलियम डिलर्स राष्ट्रिय एसोसिएसनले करिब ९२ लाख रुपैयाँ उठाए लगत्तै निगम सञ्चालकले पेट्रोल, डिजेल र हवाई इन्धनको ढुवानी भाडा तथा पम्प कमिसन वृद्धि गरेको थियो । उक्त घटना सार्वजनिक भएलगत्तै निगम सञ्चालकले केही समय कमिसन तथा ढुवानी भाडामा गरिएका वृद्धि स्थगन गरेको थियो । 'हामीले कमिसन र सञ्चालन खर्च वृद्धिजस्तो जायज माग पूरा गराउन पैसा उठाएनौं,' एक ग्यास उद्योगीले भने, 'त्यही भएर पटकपटकको अध्ययनले कमिसन तथा सञ्चालन खर्च वृद्धिमा सकारात्मक सुझाव दिए पनि त्यो कार्यान्वयन भएन ।'