चिडियाखानाका जनावरलाई मान्छेको भन्दा राम्रो खाना बाघलाई 'डाइटिङ'

भिडियो हेर्नको माथि को बक्स मा डबल क्लिक गर्नु होस्

१८ चैत, काठमाडौं । घरमा पालिने जीवजन्तुलाई धेरैले बासी, सडेगलेका र बढी भएका खानेकुरा खुवाउने गर्छन् । तर देशको एकमात्र चिडियाखानामा पालिएका जीवजन्तुले भने कहिल्यै पनि बासी र सडेगलेका खानेकुरा खान परेको छैन । चिडियाखाना प्रशासनका अनुसार जीवजन्तुलाई स्वस्थ र सन्तुलित खानेकुरामा जोड दिइएको छ ।

‘ठेकेदारले सम्झौता अनुसार गुणस्तरीय खानेकुरा ल्याएन भने हामीले फिर्ता गराउँछौं र जरीवाना समेत तिराउँछौं’ चिडियाखानाका प्रमुख सरिता ज्ञवालीले बताउनुभयो । १ सय १६ प्रजातिका झण्डै ८ सय जनावरलाई उनीहरुको रोजाई अनुसार खानेकुरा खुवाइने गरिएको उहाँले बताउनुभयो ।

मोटाएपछि बाघको भोजन घटाइयो

चिडियाखानामा रहेका चारवटै बाघ अहिले निकै मोटा भएका छन् । आहाराको लागि शिकार पनि गर्न नपर्ने र भोक लाग्ने बित्तिकै खानेकुरा भेटिहाल्ने भएकाले बाघ मोटाएका हुन् । त्यसैले अहिले बाघलाई खानेकुरा घटाइएको छ । पहिले भाले बाघलाई ६ किलो र पोथी बाघलाई ५ किलो मासु दिने गरिएकोमा अहिले एकएक किलोको दरले घटाइएको चिडियाखाना प्रशासनले जनाएको छ ।

बाघ, भालु लगायतका जनावरलाई खुवाउने खानेकुरा र दिने तरीकाको विषयमा चिडियाखानाले आइतबार पत्रकारहरुलाई जानकारी समेत गराएको थियो । पत्रकारलाई नै जनावरको खोरसम्म पुगेर आफैंले खानेकुरा दिने व्यवस्था मिलाइएको थियो ।

नयाँ जनावरको रुपमा रेडपान्डा

तीन हप्ताअघि रामेछापबाट उद्दार गरेर ल्याइएको रेडपान्डा चिडियाखानाको नयाँ जनावर भएको छ । तर यसलाई अझै प्रदर्शनीमा राखिएको छ । अहिले बिरामी भएकाले उपचारमै रहेको र केही दिनपछि दर्शकको अवलोकनका लागि राखिने चिडियाखानाले जनाएको छ ।